الحلقة ١٨ — ٧:١٦
الجزء ٣ من ٤ — ابدأ من: الحب الحقيقي ١
الحب الحقيقي ٣
كل الدواير
النبي ﷺ اتبعت للناس كلهم، وعاش بعد بداية دعوته ٢٣ سنة بس. طب مين شايل الأمانة من بعده، ويبدأ من بيته ولا من آخر الدنيا؟
اقرا الحكاية
السلام عليكم يا حبايب.
اتكلمنا الأسبوعين اللي فاتوا على إن المحبة الحقيقية هي إنك تحس بالشخص اللي بتحبه، ويكون همّك همّه، وشيلتك شيلته، وغير كده تبقى المحبة كلام بس ومش من القلب. وخلّينا نوضّح الصورة كده بسرعة، وبعدين نكمّل موضوعنا.
كل نبي لقومه
ففي حقايق كده ما فيش عليها خلاف، وهي إن نبينا الكريم عليه الصلاة والسلام هو خاتم الأنبياء والمرسلين. وبردو إن ربنا سبحانه وتعالى أرسله للبشرية في كل قارات العالم. يعني الناس دلوقتي اللي في أمريكا، في أوروبا، في الصين، في أدغال أفريقيا، نبينا الكريم هو بردو نبيهم، ولكن للأسف معظم الناس دول ما عندهمش المعلومة دي واضحة.
وبردو إن كل نبي ربنا كان بيبعته كان بيبقى لمجموعة معينة أو قرى معينة، وما كانش مأمور إنه يدعو ناس غيرهم. فمثلًا هتلاقي سيدنا إبراهيم وسيدنا لوط كانوا موجودين في نفس الوقت، ولكن سيدنا إبراهيم كان مسؤول عن دعوة قومه في العراق، واللي كانوا بيعبدوا الأصنام والكواكب. وسيدنا لوط كان مسؤول عن دعوة الناس في منطقة سدوم وعمورية في أرض فلسطين، واللي كانوا بيعملوا الفواحش.
وهتلاقي سيدنا موسى وأخوه هارون عليهما السلام، ربنا بعتهم لقومهم فقط، اللي همّ بني إسرائيل وفرعون. وسيدنا زكريا وابنه سيدنا يحيى عليهم السلام، ربنا بعتهم لبني إسرائيل في فلسطين، لدعوتهم للرجوع للتوراة الأصلية بعد ما حرّفوها.
وهتلاقي بردو سيدنا عيسى، ربنا بعته لبني إسرائيل في منطقة الشام والمنطقة اللي حواليها فقط. فحتى في قصة موجودة في إنجيل متى، إن امرأة من كنعان، يعني من العراق، وهي مش من بني إسرائيل، راحت لسيدنا عيسى تطلب منه طلب لأنها عرفت إنه نبي. ولكن سيدنا عيسى لما عرف إنها مش من بني إسرائيل، رد عليها وقال لها: لم أُرسَل إلا لخراف بني إسرائيل الضالة
. يعني يقصد إن دعوته ورسالته كانت خاصة ببني إسرائيل، وإنه غير مكلّف بيها. وطبعًا واضح إنه لو كان مبعوث للبشرية كلها، فما كانش رد عليها الرد ده.
وعشان كده تلاقي ربنا في سورة آل عمران بيوضّح الحقيقة دي على لسان سيدنا عيسى، فبيقول:
﴿وَرَسُولًا إِلَىٰ بَنِي إِسْرَائِيلَ أَنِّي قَدْ جِئْتُكُم بِآيَةٍ مِّن رَّبِّكُمْ﴾آل عمران: ٤٩
شريعة خاتمة
والخلاصة إن دين ربنا واحد، وهو الإسلام، ومعناه الاستسلام لله باتباع شرعه في أي زمان ومكان. ولكن ربنا نزّل شرائع مختلفة مع الأنبياء، ومعناها إنك تلاقي الأوامر والنواهي والحرام والحلال ممكن يختلف من نبي لنبي تاني. زي مثلًا إيه؟ الجواز من المحارم كان مسموح بيه في القرون الأولى، وبعدين اتحرّم بعد كده، وأمثلة كتيرة من كده.
وبعدين ربنا بعت نبينا الكريم عليه الصلاة والسلام بالقرآن، وبشريعة خاتمة لكل الشرائع اللي قبلها وناسخة لها. ومعنى كلمة ناسخة
يعني تلغي وتبطّل الأحكام والقوانين اللي قبلها، واللي جه بيها الأنبياء السابقين، وتثبّت بقى الشرع والقوانين الأخيرة والنهائية للبشرية، وتكون صالحة لكل زمان ومكان لحد يوم القيامة.
ولكن المشكلة هنا بقى إن نبينا الكريم توفّي من أكتر من ١٤٤٠ سنة. فإزاي يكون ربنا بعته لكل البشرية لحد يوم القيامة، وهو توفّي بعد ٢٣ سنة بس من بداية دعوته؟
والجواب هنا إن ربنا سبحانه وتعالى، ببركة خاتم النبوة، سمح لأمته وأتباعه إنهم يشيلوا أمانته ومسؤولية الأمانة دي من بعده لحد يوم القيامة. وعشان كده ربنا قال عننا:
﴿كُنتُمْ خَيْرَ أُمَّةٍ أُخْرِجَتْ لِلنَّاسِ﴾آل عمران: ١١٠
لفين ولمين؟
والتساؤل اللي كل واحد فينا المفروض دلوقتي يفكر فيه: طيب أنا فهمت إني مسؤول إني أشيل وأحمل أمانة النبي عليه الصلاة والسلام، وهي نشر دعوته والإسلام، ولكن لفين ولمين؟ يعني مثلًا أسرتي بس؟ ولا كمان قرايبي؟ ولا جيراني؟ ولا بلدي اللي أنا عايش فيها؟ ولا للعالم كله؟
والرد هنا إن هنرجع لفعل نبينا الكريم عليه السلام. فأول دايرة اشتغل فيها كانت أسرته، وربنا قال له:
﴿وَأْمُرْ أَهْلَكَ بِالصَّلَاةِ وَاصْطَبِرْ عَلَيْهَا﴾طه: ١٣٢
فأول من أسلم كانت زوجته السيدة خديجة رضي الله عنها، وبناته: السيدة زينب ورقية وأم كلثوم وفاطمة، رضي الله عنهم جميعًا.
وبعدين الدايرة التانية عيلته، وربنا قال له:
﴿وَأَنذِرْ عَشِيرَتَكَ الْأَقْرَبِينَ﴾الشعراء: ٢١٤
فأسلم معاه سيدنا علي بن أبي طالب، وبعدين بعديه بفترة أسلم بقى سيدنا جعفر وحمزة بن عبد المطلب رضي الله عنهم، ودول كانوا أول من أسلم من عشيرة النبي صلى الله عليه وسلم من بني هاشم.
وبعدين الدايرة التالتة بلده مكة، وربنا قال له: ﴿لِّتُنذِرَ أُمَّ الْقُرَىٰ﴾. وبعدين الدايرة الرابعة خارج مكة:
﴿لِّتُنذِرَ أُمَّ الْقُرَىٰ وَمَنْ حَوْلَهَا﴾الشورى: ٧
فكان النبي عليه الصلاة والسلام يروح لسوق عكاظ، وده بعيد عن مكة يجي ١٠٠ كيلو، وبيجتمع فيه بقى الناس، بيع وشرا وشعرا وكده، فيروح إنه يكلّم الناس عن الإيمان وعن الدين الجديد. وراح للطائف مشي.
وبعدين الدايرة بقى الأخيرة، وهي الأرض كلها. عشان كده ربنا قال في القرآن: ﴿كَافَّةً لِّلنَّاسِ﴾ (سبأ: 28)، وقال بردو: ﴿رَحْمَةً لِّلْعَالَمِينَ﴾ (الأنبياء: 107).
دايرة ورا دايرة؟
والسؤال اللي ممكن نفكر فيه هنا: هل كان النبي عليه الصلاة والسلام بيتحرك لكل دايرة بعد ما يخلّص الدايرة اللي قبلها؟ ولا كان بيتحرك في كل الدواير في نفس الوقت؟
والحقيقة إن النبي عليه الصلاة والسلام كان بيتحرك في كل الدواير في نفس الوقت. فبدأ بدعوة عيلته، السيدة خديجة وبناته، فأسلموا. وبعدين بدأ يكلّم بعد كده بقى القبيلة بتاعته، وبدأ يكلّم أهل مكة. فللأسف الشديد كلهم رفضوا، إلا عدد بسيط جدًا.
وهنا بقى النبي عليه الصلاة والسلام ما فضلش مستنيهم يسلموا عشان يوسّع دعوته، ولكن راح للطائف. وبردو في العام السادس من الهجرة بعت أصحابه لملوك الأرض اللي موجودين ساعتها: كسرى وقيصر وهرقل والنجاشي، وبلده مكة ما كانتش أسلمت.
يعني سنّة نبينا الكريم: التحرك في جميع الدواير في نفس الوقت. وربنا قال لنا، يعني أنا وحضرتك:
﴿لَّقَدْ كَانَ لَكُمْ فِي رَسُولِ اللَّهِ أُسْوَةٌ حَسَنَةٌ﴾الأحزاب: ٢١
الدايرة الأولانية
طيب، عاوزين بقى دلوقتي نبتدي بالدايرة الأولانية، وهي عيلة كل واحد فينا، يعني زوجته وأولاده. وإحنا الحمد لله مش بندعوهم إنهم يسلموا، لأنهم الحمد لله مسلمين، ولكن بندعوهم للإيمان الحقيقي، واليقين على كلام ربنا، وحب سنّة نبينا صلى الله عليه وسلم.
ولكن الوقت بقى اتأخر، وخلّينا نكمّل المرة الجاية. وجزاكم الله خيرًا.