الحلقة ١٦ — ٧:٠٧
الجزء ١ من ٤ — وبعدها: الحب الحقيقي ٢
الحب الحقيقي ١
شيلتك شيلتي
يوم العزومة، ابن عبد الله الصغير تاه، وأصحابه التلاتة واقفين على الباب، وكل واحد فيهم عمل حاجة غير التاني. يا ترى مين فيهم اللي حبّه بجد؟ وإحنا، محبتنا للنبي ﷺ من أنهي نوع؟
اقرا الحكاية
السلام عليكم يا حبايب.
عبد الله ومحمود وسعد وفرغلي أصحاب عمر، وفسح وخروجات وزيارات في البيوت.
المهم، عبد الله عمل لهم عزومة في بيته، ومراته بقى عملت أنواع كتيرة أكل حلو وحلويات، واتفقوا إنهم يتجمّعوا عنده يوم الجمعة بعد الصلاة.
والمهم يوم الجمعة، عبد الله رجع بعد الصلاة لقى بيته مكهرب، ومراته بتصرّخ، والولاد بيجروا بيدوّروا في كل الأوض. واتضح بقى إن ميدو، ابن عبد الله الصغير، مش لاقيينه، وقاعدين يدوّروا عليه في البيت كله.
وبعدين عبد الله قال لهم: يا جماعة، أنا لسه جاي من الصلاة دلوقتي ولقيت باب البيت مفتوح، فمية في المية الولد طلع من البيت ونزل الشارع وتاه.
ويا دوبك مراته وأولاده بيلبسوا هدومهم بسرعة عشان كلهم ينزلوا يدوّروا على الولد، فالباب خبّط، وعبد الله لقى أصحابه قصاد الباب جايين عشان العزومة. فعبد الله قال لهم: يا جماعة، ميدو ابني نزل الشارع وتايه، وكلنا نازلين عشان ندوّر عليه.
فأصحاب عبد الله، كل واحد فيهم عمل تصرّف غير التاني.
فمحمود قال له: معلش يا عبد الله يا أخويا، أنا عندي مشوار مهم جدًا ومش هقدر أنزل أدوّر معاكم، وربنا بقى يسهّل لكم وتلاقوه. وراح ماشي.
وسعد قال له: أنا هقعد في البيت أستنّاكم، ولكن قول لي على أي حاجة تحب إني أعملها: أرد على تليفونات، أحضّر السفرة، أتابع الأكل في المطبخ. يعني كل اللي هتعملوه في البيت أنا هعمله بدلكم، ولكن انزلوا إنتو دوّروا وأنا مستنّيكم.
فرغلي بقى قال له: يا عبد الله، أنا هنزل معاك الشارع أدوّر عليه، ده زي ابني، وأنا معاك لغاية ما تلاقيه.
المهم، الحمد لله لقوا الولد، واليوم عدّى. ولكن عبد الله اتغيّرت علاقته بأصحابه التلاتة، وقعد بقى مع مراته بيقول لها: أنا حزين جدًا إن حكمي على أصحابي طلع بعد كل السنين دي غلط. فكنت فاكر فعلًا إنهم إخواتي، ولكن للأسف فرغلي بس هو اللي طلع أخويا وحبيبي.
شيلتك شيلتي
والقصة دي خلاصتها يا جماعة إن محمود وسعد وفرغلي فعلًا أصحاب عبد الله، وبينهم عمر، ولكن في الشدّة الأمور بانت على حقيقتها.
فمحمود انسحب ومشي، وطلعت محبته لعبد الله كلام بس. وسعد فعلًا بيحب عبد الله، ولكن محبته بحدود؛ يعني بيحبه، ولكن ما يجيش على نفسه عشان صاحبه. ولكن محبة فرغلي بقى لعبد الله طلعت فعلًا محبة حقيقية، لأن وقت الزنقة قال لعبد الله: شيلتك شيلتي، وهمّك همّي.
ولو أخدنا بقى القصة دي على نفسنا دلوقتي، وعلاقتنا بحضرة النبي عليه الصلاة والسلام: فمثلًا في الناس هتلاقي ناس بيقولوا لك إنهم بيحبوا النبي عليه الصلاة والسلام، ولكن هل المحبة دي فعلًا محبة حقيقية؟
سنّة منسيّة
فخلّينا نقول إن محبة نبينا الكريم ممكن نترجمها في اتباع سنّته عليه الصلاة والسلام.
والمعروف عند الناس إن السنّة ممكن تبقى سنّة عادات، يعني النبي عليه الصلاة والسلام كان بيقول إيه لما ياكل، بيقول إيه لما يدخل البيت، وغيره. وفي سنّة تانية، سنّة عبادات: يعني نصلّي إزاي، سنن الصلاة قد إيه، وإزاي نعمل الحج، إزاي نعمل العمرة، والكلام ده كله.
ولكن الناس بتنسى سنّة مهمة جدًا، وهي سنّة همّ النبي عليه الصلاة والسلام: يعني إيه اللي كان بيفرّحه، إيه اللي كان بيزعّله، إيه اللي كان همّه وشاغل فكره في وقت حياته. فدي سنّة منسيّة.
فلما نيجي بقى نقيس نفسنا على كده، هنلاقي إن إحنا اتصرّفنا زي أصحاب عبد الله كده واللي عملوه معاه.
ففي ناس مننا زي محمود كده، بيقولوا: بنحب النبي عليه الصلاة والسلام، ولكن كلام بس، لأنهم عاشوا وماتوا وحياتهم كلها مالهاش أي علاقة بحياة النبي عليه الصلاة والسلام، وكانوا عايشين بنظامهم وهواهم بس.
وناس تانية زي سعد كده، فهم فعلًا بيحبوا حضرة النبي عليه الصلاة والسلام، ولكن بيعملوا سنن العادات والعبادات بس، ولكن همّهم وحزنهم وفرحهم مالهمش أي علاقة بالنبي الكريم.
وفي ناس أخيرة بقى زي صاحبنا فرغلي كده، فمحبتهم لنبينا الكريم حقيقية؛ فبيعملوا سنن العادات والعبادات، ولكن كمان كانوا في حياتهم همّهم زي همّ النبي عليه الصلاة والسلام.
وعشان كده بيقول نبينا الكريم: لا يؤمن أحدكم حتى يكون هواه تبعًا لما جئت به
. يعني يكون اتباعك للنبي عليه الصلاة والسلام كامل، حتى لو كان معاكس لهواك.
حيث بلغ الليل
فالنبي عليه الصلاة والسلام كان دائم الفكر، متواصل الأحزان. ولكن ما كانش همّه وحزنه زيّنا كده، على أرض ما اشتراهاش، ولا على شغلانة طارت منه، ولا خوف على تجارة خايف إنه يخسرها. ولكن همّه إنه عرف إنه آخر مبعوث من الله للبشرية كلها، وإن رغم إن عمره محدود، إزاي يكون سبب لهداية قلوب البشر دي كلها. فكان همّ تقيل ومسؤولية تقيلة جدًا.
فمرة رجع النبي عليه الصلاة والسلام [غير واضح] من غزوة كده، فاستقبلته بنته السيدة فاطمة رضي الله عنها وهي قاعدة تبكي وتعيّط. فلما النبي ﷺ سألها: إنتِ بتعيّطي ليه؟ ليه حزينة كده؟ فقالت له: يا رسول الله، أراك وقد شحب لونك، واخلولقت ثيابك
.
يعني إيه؟ يعني بتقول له: وشّك أصفر كده من التعب والجوع، وهدومك بردو مش أحسن حاجة. وده طبعًا كان بسبب السفر في الصحرا لفترات طويلة، عشان يروح يدعو القبائل للإسلام.
فالنبي عليه الصلاة والسلام قال لها: يا فاطمة، لا تبكي، فإن الله بعث أباك بأمر لا يبقى على ظهر الأرض بيت مدر ولا شعر إلا أدخله الله به عزًّا أو ذلًّا، حتى يبلغ حيث بلغ الليل
.
يعني إيه؟ يعني بيقول النبي عليه الصلاة والسلام للسيدة فاطمة إنه مش هيبقى في بيت في الأرض، سواء البيت ده مبني من الطوب والحجارة زي المدن كده، أو البيت ده عبارة عن خيمة زي البيوت بتاعة الصحرا، يعني كل مكان، إلا وهيدخل فيه الإسلام.
ومعنى الحديث يا جماعة إن الإسلام هيوصل لكل مكان في الأرض، يعني زي الليل كده ما بيوصل لكل مكان.
ولكن إزاي الإسلام يوصل لكل مكان في الأرض، ونبينا الكريم عمره محدود ومات، والإسلام وقت موته ما كانش خرج من الجزيرة العربية؟
فخلّينا نكمّل بقى المرة الجاية: هل إحنا لنا دور ومسؤولية في الموضوع ده؟ وهل فعلًا محبتنا لنبينا الكريم محبة حقيقية، وهمّنا همّه، وشيلتنا شيلته، ولّا لا؟
وجزاكم الله خيرًا.