الحلقة ١٩ — ٦:٥٢
الجزء ٤ من ٤ — ابدأ من: الحب الحقيقي ١
الحب الحقيقي ٤
زي الجاتوه
لو الفراخ طلعت من العشة، تشتري غيرها ولا تدخّل بتوعك؟ وإزاي الدين يدخل البيت حلو، زي الجاتوه، مش زي الدوا؟
اقرا الحكاية
السلام عليكم يا حبايب.
اتكلمنا الحلقة اللي فاتت على إن نبينا الكريم عليه الصلاة والسلام بدأ بدعوة أهل بيته، وبعدين الدايرة بدأت توسع: لعيلته، وبعدين قبيلته، وبعدين مكة، وبعدين المناطق اللي جنبها، وبعدين بعت لملوك الأرض كلهم.
ولكن معظم الدواير اللي قلناها دي، الناس اللي فيها دلوقتي مسلمين. يعني عيلتنا، واللي حوالينا، والقرية بتاعتنا، والبلد، كل الدواير دي مسلمة. فهنعمل إيه دلوقتي؟ هل بقى نعدّي الدواير دي كلها، ونروح لغير المسلمين في بلاد تانية ندعوهم للإسلام؟
الفراخ اللي طلعت من العشة
وهنا بقى خلّينا نضرب مثل هنفهم بيه الموضوع ده: إن واحد عنده عشة كده بيربّي فيها فراخ، وبعدين نسي باب العشة مفتوح، والفراخ طلعت في الجنينة بتاعته. فهل ينسى الفراخ اللي طلعت دي، ويروح السوق يشتري فراخ جديدة؟ ولا يدخّل الفراخ بتاعته مرة تانية؟
فالإجابة اللي كلنا طبعًا هنقولها: يروح يشتري جديد ليه؟ ما يدخّل بتوعه تاني.
والمثل ده بيوضّح الحقيقة اللي موجودة دلوقتي، وهي إن أصل الدعوة اللي جه بيها نبينا الكريم عليه الصلاة والسلام كانت لغير المسلمين. ولكن لو بصّينا للواقع اللي حوالينا، فكتير جدًا من المسلمين دلوقتي همّ مسلمين بالاسم بس، ولكن بعيدين تمامًا عن الإسلام.
وعشان كده جهد الدعوة دلوقتي اتحوّل من إدخال غير المسلمين للإسلام، لإرجاع المسلمين أصلًا للإسلام مرة تانية. وبكده للأسف إحنا ظلمنا غير المسلمين، لأن الوقت والجهد والفكر اللي بيتعمل لإرجاع المسلمين لدينهم مرة تانية، المفروض ده يبقى لغير المسلمين إنهم يدخلوا في الإسلام. وعشان كده مضطرين بقى نرجع للدايرة الأولانية، اللي هي الأسرة.
عم الحاج
والمشكلة دلوقتي إنك لما تيجي تسأل يعني راجل كبر واتجوز وخلّف وعنده ولاد وكده، وتقول له: يا عم الحاج، أخبارك إيه؟ فتلاقيه بيقول لك: الحمد لله، أنا أدّيت دوري في الحياة، والولاد اتعلموا واتخرجوا واشتغلوا، واشتريت لهم شقق وعربيات.
وطبعًا يعني دي حاجة ممتازة، وجهد كبير يُشكر عليه. ولكن لما تيجي تسأله عن دينهم والتزامهم والحلال والحرام في حياتهم، فتلاقي الكتير يرد ويقول لك: الهداية دي بقى من عند ربنا. همّ يعني إي نعم ما بيصلّوش قوي ومقصّرين مع ربنا، والبنات مش متحجبات وكده، لكن والله أخلاقهم حلوة، وقلوبهم بيضا جدًا.
وللأسف بقى عم الحاج اللي بنتكلم عليه ده، في منه كتير بينّا دلوقتي، وفاهمين إن دورهم في الحياة إن ولادهم يعيشوا صح بس. وموضوع بقى الدين والصلاة والخوف من ربنا، ده ما كانش يعني قصة كبيرة في حياتهم وهمّ بيربّوا ولادهم.
خد لي حقي منهم
وعشان كده من الحاجات اللي ما حدّش متوقعها، إن الابن اللي أبوه وأمه ما ربّوهوش على الدين، هييجي يوم القيامة ويمسك في أبوه وأمه ويشتكيهم لربنا.
فالأب يقول له: يا ابني، ده أنا تعبت واشتغلت طول عمري عشان أعلّمك وأجيب لك الشقة والعربية.
فالابن يرد يقول له: النهارده اسمه يوم الدين، اللي معاه دين بيعدّي، واللي معهوش دين بيستنّى. وإنتوا ما ربّيتونيش على الدين، وأنا يعني اتسبت كده من غير ما أعرف الحلال والحرام والحاجات دي كلها، فأنا كده ممكن أدخل النار. فيا رب، خد لي حقي منهم.
تخيّلوا واحد يقول لربنا: خد لي حقي من أبويا وأمي!
عند سيدنا عمر
وفي قصة إن واحد راح لسيدنا عمر بن الخطاب رضي الله عنه يشتكي من عقوق ابنه. فسيدنا عمر جاب الولد وسأله: ليه هو بيعقّ أبوه؟
فالولد قال له: يا أمير المؤمنين، مش الولد له حق على أبوه؟ فسيدنا عمر قال له: طبعًا. قال: إيه الحقوق دي يا أمير المؤمنين؟ قال له: إن هو يعني ينقّي أمه، يعني تكون أم صالحة، ويحسّن اختيار اسمه، ويعلّمه القرآن.
فالولد رد وقال له إن أبوه ما عملش أي حاجة من الحاجات دي. يعني أمه ما كانتش صالحة، وما علّمتوش الدين، وما اختارلوش اسم كويس، وما علّموش القرآن.
فسيدنا عمر بصّ للأب وقال له: جئتَ تشتكي عقوق ابنك، فاعلم أنك قد عققته قبل أن يعقّك، وأسأت إليه قبل أن يسيء إليك
.
زي الجاتوه، مش زي الدوا
ولكن السؤال المهم هنا بقى: إزاي الدين يدخل جوّه بيوتنا؟ وإزاي الدين لما يدخل، يدخل محبّب للأولاد؟ يعني يدخل زي الحاجة الحلوة، زي الجاتوه كده، وما يدخلش زي الدوا وبالعافية.
لذلك مهم جدًا وإحنا بنربّي ولادنا، قبل ما نربّيهم إزاي يتوضّوا وإزاي يصلّوا، حاجات طبعًا مهمة جدًا، لكن مهم نربّيهم على إن ربنا شايفهم، وإن همّ يعني لو بيحبوا ربنا وبيطيعوه فحياتهم هتبقى حلوة، والعكس بردو هيكون صحيح.
تلات كلمات
وعشان كده في واحد أعرفه كان دايمًا يقول لي: أنا بربّي ولادي على تلات كلمات. قلت له: إيه التلات كلمات دول؟ قال لي: التلات كلمات: الله شاهدي، الله ناظري، الله مطّلع عليّ.
وبيقول لهم: إن أنا ممكن ما بقاش شايفك، لكن ربنا شايفك وسامعك وعارف إنت بتعمل إيه. ولو غلطت فارجع له. ليه؟ لأن ربنا بيحبك وهيسامحك.
فكان بيقول لي: أنا مش هقدر أعمل قفص حديد حوالين ولادي طول العمر، وهمّ بشر، ولازم هيغلطوا زي ما إحنا كلنا بنغلط. ولكن إزاي يكون عندهم نفس لوّامة.
يعني إيه نفس لوّامة؟ يعني لما حد فيهم يعمل الغلط، يبقى تعبان ومش مستريح ومتضايق من نفسه. ودي بقى نفس ربنا بيحبها، لأن رغم إنها بتغلط، لكن دايمًا عاوزة ترجع وتتوب.
دعوة الحال
والمقصود يا جماعة إنه ما فيش دين بالعافية ولا بالعصاية. ولكن الدين يدخل بيوتنا بالمحبة والإكرام وحسن الخلق، وإن إحنا نطبّقه على نفسنا الأول، وأولادنا يشوفوه فينا قبل ما نأمرهم بيه.
ودي بقى اسمها دعوة الحال. ومعناها إن ولادنا يشوفوا الدين، والعلاقة بربنا، والخوف من الحرام والحلال، وتطبيق سنّة النبي عليه الصلاة والسلام في حياتنا وفي نفسنا وفي تصرفاتنا، وإن ده العادي اللي موجود في بيوتنا، فبإذن الله يطلعوا كده.
ودي بنسمّيها الدعوة الصامتة. ليه؟ لأنها بتأثّر بالتصرفات والأخلاق. ودي طبعًا بتبقى أقوى كتير، وتأثيرها أقوى جدًا من دعوة تانية اسمها دعوة المقال.
اللي هي إيه؟ الواحد فينا ممكن يأمر ولاده بحاجات، ولكن هتلاقيه هو ما بيعملهاش. والعكس بردو: ممكن ينهاهم عن حاجات، ولكن هو بيعملها، وأولاده شايفينه وهو بيعملها. وطبعًا دعوته ما بيكونش لها تأثير، لأنها عكس الواقع اللي همّ شايفينه وعايشينه.
وأسأل ربنا سبحانه وتعالى إنه يجعل بيوتنا فيها الدين الحقيقي، والحب، والخوف من ربنا، ومحبة اتباع سنّة النبي صلى الله عليه وسلم في كل تفصيلة من حياتنا. وجزاكم الله خيرًا.
---