الحلقة ١٧ — ٨:٤٧
الجزء ٢ من ٤ — ابدأ من: الحب الحقيقي ١
الحب الحقيقي ٢
على بصيرة
راجل ممكن يتسجن الصبح، ورجع بالليل لقى البيت كله بيعيط، وكل واحد على حاجة تانية. طب لما نقول بنحب النبي ﷺ، همّنا همّه بجد؟
اقرا الحكاية
السلام عليكم يا حبايب.
عرفنا في الحلقة اللي فاتت قصة عبد الله وأصحابه، وإنه كان فاكر إنهم أقرب الناس له بعد أهله. ولكن لما مرّ بالمشكلة عرف الحقيقة، وعرف يميّز بين الصاحب وبين الحبيب، وعرف إن الحبيب الحقيقي هو اللي همّك همّه وشيلتك شيلته.
وبعد كده قِسنا الموضوع ده على محبتنا لنبينا الكريم عليه الصلاة والسلام. والحقيقة إن كل المسلمين بيقولوا: بنحبك يا رسول الله، وهمّ فعلًا بيحبوه، ولكن المحبة درجات. وأعلى حاجة فيها إن اللي بيحب حد بجد هيحس بيه ويشيل معاه حمله، وغير كده يبقى كلام بس.
الراجل اللي بيته كله بيعيط
وفي قصة إن رجل أعمال دخل في مشاكل في شغله وقضايا، وعنده تاني يوم الصبح جلسة في المحكمة، وممكن يتسجن. فطول النهار كان مهموم جدًا، ومن محامي لمحامي، ومن مكتب لمكتب.
المهم رجع البيت بالليل مهدود ومهموم جدًا، فلقى مراته وابنه وبنته بيعيطوا. فحضنهم وقعد يطمّنهم، وقال لهم: يا جماعة ما تخافوش، وإن شاء الله بكرة ربنا هينجّيني وما اتسجنش.
فمراته قالت له: على فكرة، البنت بصراحة مش بتعيط عشانك. قال لها: أمّال بتعيط عشان إيه؟ قالت له: بتعيط عشان عاوزة فستان جديد.
فبصّ للبنت وقال لها: أنا عارف من زمان إنك إنتِ أي كلام. وبعدين قال لمراته وابنه: إنتوا بقى اللي طلعت بيكم الدنيا.
فمراته قالت له: بصراحة الولد بردو ما بيعيطش عشانك. فقال لها: أمّال بيعيط ليه؟ فقالت له: عاوز عجلة بتنوّر.
فبصّ لابنه بحزن كده وقال له: وإنت كمان طلعت فشنك. وبعدين بصّ لمراته وقال لها: إنتِ بس، إنتِ بس الحمد لله عليكِ.
فقالت له: بصراحة يعني أنا بردو ما كنتش بعيط عشانك. فقال لها: أمّال كنتِ بتعيطي عشان إيه؟ قالت له: أنا كنت بعيط عشان الولاد بيعيطوا.
فالراجل ده المفروض يعمل إيه في مراته وأولاده؟ عامةً هسيب الرد عندكم. ولكن الحقيقة إنهم بيحبوه، ولكن همّهم مش همّه.
الولد اللي فرح النبي ﷺ بإسلامه
ونرجع بقى هنا لنبينا الكريم عليه الصلاة والسلام. كان في ولد يهودي صغير بيخدمه، والولد عيِي وكان خلاص بيموت. فالنبي عليه الصلاة والسلام راح يزوره في بيته، وقعد كده عند راسه، ودعاه إنه يسلم.
فالولد بصّ لأبوه، فأبوه قال له: أطِع أبا القاسم. فالولد نطق الشهادة وأسلم، وبعدها مات. فالنبي عليه الصلاة والسلام خرج وهو سعيد، وقال: الحمد لله الذي أنقذه من النار
.
فلما نيجي بقى نفهم القصة كده، هنلاقي إن النبي عليه الصلاة والسلام فرح بإسلام الولد ده جدًا، رغم إنه عارف إن الولد ده خلاص بيموت، ومش هينفع الإسلام ولا المسلمين بحاجة. ولكن فرح النبي الكريم إن نفس ربنا خالقها نجت من النار ودخلت في رحمة ربنا. فده كان همّ نبينا الكريم وفكره.
فإحنا بقى اللي بنقول إننا أحباب رسول الله عليه الصلاة والسلام، هل بالحقيقة كده إحنا فكرنا زي فكره عليه السلام؟
الضيق اللي ما بيغيّرش حاجة
وعامةً خلّينا نشوف الواقع اللي إحنا عايشين فيه دلوقتي. فالمسلمين دلوقتي عندهم ضيق شديد جدًا من المعاصي اللي موجودة، والبعد عن ربنا اللي بنشوفه في عائلاتنا، وفي أماكن شغلنا، وفي حياتنا عامةً.
وهنلاقي ناس مننا متضايقة جدًا، ولكن بتكتم الضيق ده جواها وخلاص. وناس تانية مننا بتدعي للعصاة دول بالهداية. والأكتر بقى للأسف بيدعي عليهم بالهلاك، وإن ربنا ياخدهم ويخلّصنا منهم.
والمشكلة هنا بقى إن ردود الأفعال دي كلها، وإن كان بعضها شكله كويس، ولكن هي بعيدة عن ردود أفعال نبينا الكريم. وده ليه؟ لأن ردود الأفعال كلها سلبية. وعشان كده العاصي هيفضل عاصي، والظالم هيزيد ظلمه، والدايرة هتفضل تلف.
ده شغل العلما
وهنا بقى هتيجي الناس تسأل وتقول: طيب يعني إنت عاوزنا نعمل إيه؟ عاوزنا مثلًا نروح نتكلم مع الناس دول ونقول لهم: يا جماعة ارجعوا لربنا؟ وإحنا لا وعّاظ ولا علما، ولا إحنا حافظين أجزاء من القرآن، ده إحنا يا دوبك حافظين آيتين صغيرين بنصلي بيهم. وبردو ممكن اللي بنكلّمه ده يجرحنا بكلمة كده ولا كده، وإنت عارف إحنا ناس محترمين. وبردو ممكن يسألنا في فتوى ولا في حاجة، ففي الحالة دي هنعمل إيه؟ نرد إزاي؟ نألّف؟
فالرد هنا يا جماعة إن الشيطان هنا بيدخل في الموضوع ده، وبيقول للي بيفكر بالطريقة دي: إنت يكفيك تعمل الأساسيات والعبادات اللي مطلوبة منك، ولكن الشغلانة دي بصراحة بقى بتاعة العلما وحفظة القرآن وأئمة المساجد، وإنت مالكش دعوة بالموضوع ده.
والحقيقة إن لو نبينا الكريم وصحابته الكرام كانوا عملوا كده، وقعدوا معاه في المسجد في المدينة يحفظوا ويسمعوا ويتعلموا بس، فما كانش الدين طلع من المدينة، وكان زمان كل واحد فينا دلوقتي على دين تاني غير دين الإسلام.
وبعدين خلّينا نسأل نفسنا كده: هو الصحابة كلهم كانوا حفظة وعلما؟ والحقيقة، مع إنهم أنضف قلوب ربنا خلقها، واتشرّفت بصحبة خير البرية نبينا عليه الصلاة والسلام، ولكن كان عدد الحفظة والعلما فيهم قليل جدًا. ولكن كلهم بلا استثناء كانوا دعاة إلى الله.
ولو آية
والصراحة بقى، لحد هنا الموضوع شكله عند ناس كتيرة جدًا مش هيبقى مفهوم، فهيقولوا: إيه يعني؟ أنا وحضرتك دلوقتي لا إحنا صحابة، ولا إحنا حفظة، ولا إحنا علما. طيب نعمل إيه عشان محبتنا لنبينا الكريم تكون حقيقية وما تكونش كلام بس؟
والرد هنا سهل، ونبينا الكريم قاله عليه الصلاة والسلام لما قال: بلّغوا عني ولو آية
. يعني حضرتك حافظ الفاتحة؟ فكده معاك سبع آيات تعلّمهم لغيرك.
وهتلاقي هنا بقى، أول ما نقول الكلمة دي، في واحد يقول: يا شيخنا فاتحة إيه؟ هو في حد دلوقتي مش حافظها؟ وللأسف آه، وألف آه. واسأل كده وجرّب في الناس اللي بتتعامل معاهم طول اليوم واللي حواليك، وهتشوف العجب. وبردو بالمرة اسأل عن الوضوء، واسأل كده مثلًا عن غسل الجنابة وغيره، وهتتفاجئ بالعجب، إن في ناس كتيرة جدًا ما تعرفش حاجة.
على بصيرة
وبعدين هتلاقي ربنا بيقول لنبينا الكريم في القرآن:
﴿قُلْ هَٰذِهِ سَبِيلِي أَدْعُو إِلَى اللَّهِ عَلَىٰ بَصِيرَةٍ أَنَا وَمَنِ اتَّبَعَنِي وَسُبْحَانَ اللَّهِ وَمَا أَنَا مِنَ الْمُشْرِكِينَ﴾يوسف: ١٠٨
وكلمة مَن اتّبعني
دي يعني أنا وحضرتك، وهو وهي، وكل اللي بيقول أنا مسلم ونبيّي محمد عليه الصلاة والسلام. وبعدين كلمة على بصيرة
دي معناها اللي إنت عارفه ومتأكد منه.
يعني لما تقابل واحد وتقول له إن نبينا الكريم قال: اللي يقول سبحان الله وبحمده
في اليوم ١٠٠ مرة، وما تاخدش منك يجي تلات دقايق كده، فربنا يغفر لك ذنوبك كلها مهما كانت كتيرة، حتى لو كانت زي الرغوة البيضا اللي بتطلع من البحر. مهما كانت الذنوب، ربنا يغفرها بـ١٠٠ مرة سبحان الله وبحمده
.
وبردو مثلًا تلاقي واحد ما بيصليش، فلما تقول له بالحكمة كده إنك لازم تصلي وتقرّب من ربنا، فكده إنت بتدعو إلى الله على بصيرة. وقِس على كده بقى كتير: واحد مثلًا قاطع رحم، واحد واكل ورث إخواته، وغيره وغيره، فننصحهم بالحسنى.
وبردو أي واحد من اللي بتنصحهم دول، مرة واحدة كده تلاقيه سألك في فتوى شرعية، أو حاجة معينة، أو سؤال معين. فالرد سهل يا جماعة: إن إحنا نوجّهه للعلما، أو مثلًا للجنة الفتوى في الأزهر أو غيره.
ورث النبي ﷺ
وهنا أظن بقى الأمور بدأت توضح، وهي إنه بعد وفاة نبينا الكريم فكلنا ورثنا منه مسؤولية الدين. وإن كل واحد فينا، رضي أو ما رضيش، إنت داعي إلى الله بورث النبي اللي خدته منه عليه الصلاة والسلام. ولكن باللي نعرفه، واللي متأكدين منه، نقوله لغيرنا.
وهنا بقى هييجي سؤال: طيب إزاي يعني أدعو مراتي وأولادي وقرايبي، وبعد كده بقى الدايرة بتاعة معارفي وأصحابي وغيره؟
وهنا بقى خلّينا نوقف، ونكمّل الأسبوع الجاي بإذن الله. وجزاكم الله خيرًا.