الحلقة ١٥ — ٩:٣٢
عزا من غير ميّت
قرآن الساعة تمانية
التلفزيون الجديد فتح لوحده الصبح على قرآن، والعمارة كلها لبست اسود ونزلت تعزّي في الحاجة أم بدرية. طب هو مين اللي مات بجد؟
اقرا الحكاية
السلام عليكم يا حبايب.
الأستاذ مبروك ومراته الست بدرية وأولادهم ساكنين في شقة في عمارة كبيرة، ولهم جيران كتير، وعلاقتهم حلوة بالجميع. وأم الست بدرية كبيرة في السن وسمعها ضعيف وعايشة معاهم، وكل شوية مستشفيات ودكاترة، طالعين ونازلين، والجيران كل شوية بيسألوا عليها وبيدعوا لها.
المهم، الأستاذ مبروك اشترى تلفزيون جديد، وقعد بقى هو ومراته وأولاده يشغّلوه، ويقروا الكتاب بتاعه، ويتعلّموا الحاجات الجديدة اللي موجودة فيه. وطلع فيه خاصية إنه ممكن يتظبط يفتح لوحده في الوقت اللي إنت عاوزه، وكمان يشغّل لك القناة اللي إنت عاوزها بالظبط، وإنت بعيد عنه.
المهم، بعد ما قاموا ودخلوا يناموا، محروس ابن الأستاذ مبروك الصغير قعد يلعب في الريموت، وبالغلط ظبط التلفزيون إنه يفتح تاني يوم الساعة تمانية الصبح على قناة فيها قرآن شغّال على طول.
وتاني يوم الصبح الأستاذ مبروك ومراته وأولاده نزلوا الساعة سبعة، اللي رايح على شغله واللي رايح على مدرسته، وسابوا الحاجة أم بدرية نايمة زي كل يوم، وهي متعوّدة إنها تصحى على العصر لما يرجعوا، تاكل وتقعد معاهم.
المهم، بعد ما نزلوا بساعة، التلفزيون زي ما الواد محروس الصغير ظبطه فتح لوحده، والقرآن اشتغل بصوت عالي. والجيران بقى طالعين ونازلين هم وأولادهم سامعين صوت القرآن خارج من شقة الأستاذ مبروك، فافتكروا إن الحاجة أم بدرية ماتت، وإنهم مشغّلين قرآن على روحها. وما فيش ساعة ساعتين إلا والخبر انتشر، والجيران في عمارتهم والعمارات اللي جنبهم والشارع وصل لهم الخبر.
الجيران لابسين اسود
المهم، الأستاذ مبروك وبدرية وولادهم رجعوا على العصر، ولقوا التلفزيون مفتوح والقرآن شغّال، فاستغربوا وقفلوا الصوت وقعدوا ياكلوا.
المهم، شوية كده والباب قعد يخبّط. فلما فتحوا الباب، لقوا الجيران كلهم، رجالة وستات، لابسين اسود قصاد الباب. وكل واحد فيهم يدخل يقول لهم: إيه يا جماعة، شدّوا حيلكم، البقاء لله، كلنا لها، أدي حال الدنيا، ربنا يجعل مثواها الجنة. مش كنتوا يا جماعة تقولوا لنا؟ ده إحنا جيران وحبايب، وكنا وقفنا معاكم!
وفيه بقى ستات أوفروا شوية، وقعدوا يعيّطوا ويقولوا: والله كانت ست طيبة.
المهم، وسط المولد ده، الأستاذ مبروك وبدرية وولادهم قاعدين يبصّوا لبعض، ومستغربين، ومش فاهمين حاجة. ويا دوبك كده لسه قاعدين مع الجيران بيفهّموا اللخبطة اللي حصلت، طلعت الحاجة أم بدرية بالعكّاز بتاعها، بتخبّط بيه، من الأوضة وطالعة للصالة، وقاعدة تقول: هو فيه إيه يا بدرية؟ فيه إيه يا مبروك؟ إيه الدوشة دي؟
المهم، الجيران شافوها، ومن هنا الستات تزغرط، والرجالة تكبّر وتقول: الله أكبر! يحيي العظام وهي رميم!
فالحاجة أم بدرية قعدت تزعق وتقول: ما تفهّموني فيه إيه يا ولاد!
فبنت الأستاذ مبروك قامت كده ووشوشتها في ودنها وقالت لها: ما فيش حاجة يا تيتة، دول الجيران جايين يعزّوا فيكي.
قرآن طالع من كل البيوت
المهم، القصة دي يا جماعة بتبيّن لنا حاجة، وللأسف هي حاجة سيئة جدًا وبقت موجودة في مجتمعنا: إن القرآن لما بيتسمع طالع من بيت أو شقة، فده دليل شؤم، وإن فيه حد مات. مع إن أيام النبي عليه الصلاة والسلام والصحابة، كان اللي يمشي في شوارع المدينة يسمع صوت القرآن طالع من كل البيوت بيتقري.
وعشان كده تلاقي ربنا في القرآن بيقول لنا:
﴿وَقَالَ الرَّسُولُ يَا رَبِّ إِنَّ قَوْمِي اتَّخَذُوا هَٰذَا الْقُرْآنَ مَهْجُورًا﴾الفرقان: ٣٠
والهجر هنا بقى يا جماعة أنواع.
فأسوأ هجر هو هجر قرايته وسماعه. فتلاقي ناس أول ما تسمع قرآن، يا يقوم من المكان، يا يغيّر المحطة بتاعة الراديو أو التلفزيون، أو يقلب صفحة الموبايل. مع إنه ممكن يقعد يسمع أغنية ويعيدها بالساعات. وسبحان الله، دي قلوب ملخبطة وتايهة.
والهجر التاني هو هجر تدبّره وفهمه. يعني تلاقي واحد بيقرا القرآن زي البغبغان كده، فهو بيقرا بس، ولكن مش فاهم هو بيقرا إيه ولا بيقول إيه. ودي تلاقيها واضحة قوي لما تلاقي شيخ صوته حلو جدًا، وقاعد يرتّل ويجوّد في القراية، والناس قاعدة قصاده متسلطنة ومتكيّفة من طريقة قرايته بس، ولكن لا هم فاهمين معنى الآيات اللي بيقراها ولا حاجة.
فتلاقي مثلًا الشيخ بيقرا سورة ق:
﴿يَوْمَ نَقُولُ لِجَهَنَّمَ هَلِ امْتَلَأْتِ وَتَقُولُ هَلْ مِن مَّزِيدٍ﴾ق: ٣٠
والناس بعدها تفضل تقول: الله الله يا شيخ! الله يفتح عليك! عيد، عيد تاني! مع إن المفروض اللي فهم معنى الآية يكون مرعوب وخايف، وعايزها تعدّي بسرعة، والشيخ يدخل بقى بعديها في آيات الجنة. ولكن للأسف، بسبب عدم الفهم، هم مبسوطين من الصوت بس.
والهجر الأخير هو هجر خطير جدًا، وهو هجر الأوامر. فتلاقي ناس بتقرا القرآن وفاهمة كويس جدًا هي بتقول إيه وبتقرا إيه، وعارفة أوامر ربنا وسامعاها، ولكن يا إما ما بتعملهاش، يا إما بتعمل عكسها.
جوافاية وتمراية وريحانة وحنظلة
وعشان كده النبي عليه الصلاة والسلام شبّه الناس وعلاقتهم بالقرآن بأربع تشبيهات.
فقال لك: فيه ناس تلاقيهم زي الجوافاية أو المنجاية المستوية كده، ريحتها حلوة، ولما تاكلها تلاقي طعمها حلو. ودي زي المؤمن اللي بيقرا القرآن: فتلاقيه من برّه حلو، ولما تتعامل معاه تلاقيه برضه محترم وبيخاف من ربنا.
وناس تانية عاملة زي التمراية: مالهاش ريحة من برّه، ولكن لما تحطها في بقّك كده تلاقي طعمها حلو. ودي زي الناس اللي ما بيقروش القرآن، ولكن هم مؤمنين، فلما تتعامل معاه تلاقيه محترم، وتلاقيه كويس، وبيخاف من ربنا.
والتشبيه التالت بقى بناس عاملة زي الريحانة. والريحانة دي يعني إيه؟ زي زهرة كده، ريحتها حلوة جدًا، ولكن طعمها مرّ. ودي بقى عاملة زي المنافق اللي بيقرا القرآن: فمن برّه تلاقيه شيخ، ولكن لما تتعامل معاه تلاقيه مالوش علاقة بالدين.
والتشبيه الرابع بقى زي الحنظلة، ودي زرعة ريحتها وحشة وطعمها مرّ. ودي زي الشخص المنافق اللي ما بيقراش القرآن: فتلاقيه من برّه وحش، ولما تتعامل معاه تلاقيه أوحش.
عبد معتوق على مكة
ونبيّنا الكريم برضه وضّح لنا إن الدرجات عند ربنا مالهاش دعوة بالتقسيمة اللي إحنا عاملينها لنفسنا في الدنيا، ومقسّمين بعض درجات على أساسها.
ففي قصة إن سيدنا عمر لما كان أمير المؤمنين، عيّن الصحابي نافع ابن الحارث مسؤول عن مكة، يعني زي المحافظ كده عندنا. وبعدين سيدنا نافع كان عنده سفر برّه مكة، فعيّن النائب بتاعه. مين بقى النائب ده؟ صحابي اسمه عبد الرحمن بن أبزى، فعيّنه مسؤول عن مكة بداله لغاية ما يرجع من السفر.
والمهم، سيدنا عمر قابل سيدنا نافع في السفر بتاعه، وسأله: إنت عيّنت مين مكانك مسؤول عن مكة لغاية ما ترجع؟
فسيدنا نافع قال له: عيّنت عبد الرحمن بن أبزى.
فسيدنا عمر استغرب من اختيار سيدنا نافع. ليه؟ لأن عبد الرحمن بن أبزى ده معروف إنه كان عبد عند سيدنا نافع نفسه وأعتقه. وطبعًا مكة في الوقت ده فيها أشراف من قريش، وعندهم بقى الحسب والنسب، فتعيينه ممكن يعمل شيء في النفوس لما يلاقوا عبد معتوق هو اللي متفضّل عليهم.
وكان ردّ سيدنا نافع إن اختياره لعبد الرحمن بن أبزى كان بسبب إنه حافظ لكتاب الله، وعالم بأحكامه.
فسيدنا عمر هنا وافق على الاختيار، وقال له: إن نبيّكم عليه الصلاة والسلام قال: إن الله يرفع بهذا الكتاب أقوامًا ويضع به آخرين
.
كلام رب العالمين
يعني من الآخر يا جماعة، القرآن ربنا ما بعتهولناش عشان نحطّه في بيوتنا ومكاتبنا وعربياتنا للبركة، ولا إننا نهجره ونفتكره في رمضان، ولا لما حد من قرايبنا أو أصحابنا يموت ونعمل له ختمة، ولا إننا نقراه زي البغبغانات ومش فاهمين بنقرا إيه ولا بنقول إيه، ومن جوّانا بنقول: الحمد لله، أنا كل يوم بقرا الجزء بتاعي.
ولكن القرآن لازم نحترمه ونفهمه، لأنه كلام رب العالمين. وكان سيدنا الحسن البصري بيقول: من أراد أن يكلّمه الله فليقرأ القرآن
.
فالناصح فينا، زي ما لازم كل يوم ياكل ويشرب، فبرضه يكون له كل يوم ورد من القرآن لازم يقراه. ونحاول نقعد مع عالِم، نقرا تفاسير، ندوّر على النت. المهم نتدبّر ونفهم معنى الآيات اللي بنقراها. ولو إحنا مش عارفين نعمل كده، وإحنا عرب والقرآن بلغتنا، طيب أمّال بقى المسلمين الأجانب اللي ما بيعرفوش عربي يعملوا إيه؟
ونختم يا جماعة بحديث نبيّنا الكريم عليه الصلاة والسلام، بيقول: اقرؤوا القرآن، فإنه يأتي يوم القيامة شفيعًا لأصحابه
.
وندعو الله سبحانه وتعالى إن إحنا لما نيجي يوم القيامة يكون القرآن شاهد لينا ومش علينا. وجزاكم الله خيرًا.