عربية السوبر ماركت

نص الحلقة

السلام عليكم يا حبايب.

كلّنا تقريبًا يعني أكتر من مرة في الأسبوع بنروح سوبر ماركت. وطبيعي الواحد أول ما بيدخل بياخد عربية ويمشي بيها جوّه، عشان يحطّ الحاجة اللي هو عاوزها.

ودايمًا وإحنا بنحطّ بنبصّ على الأسعار. والواحد دايمًا قبل ما بيحطّ الحاجة بيفكّر: هل دي تمنها مناسب معايا ولا لا؟ والله لو ما أقدرش على تمنها، مش هحطّها. صحيح.

وهكذا الواحد بيمشي بيها بقى في السوبر ماركت، يفضل يلفّ ويلفّ ويلفّ. لكن طول ما هو ماشي، دماغه فين يا جماعة؟ في الكاشير. هحاسب على الحاجات دي اللي معايا إزاي؟ هل معايا الفلوس دي كاش؟ هل الكارت بتاعي فيه المبلغ ده ولا لا؟

عشان كده تلاقي الناس عند الكاشير، وهي واقفة في الطابور كده، يفضل الواحد يراجع نفسه. وتلاقي قبل الكاشير كده في ترابيزة، تلاقي حاجات كتيرة محطوطة فيها. الناس تبتدي تعيد حساباتها، يقول لك: لا، أنا معيش فلوس لدي، لا دي غالية عليّا. فكل واحد قبل الكاشير يقعد ينزّل الحاجات اللي معاه.

فعشان كده يقول لك إيه؟ خلّي بالك: خلّي في عربيتك بس اللي تقدر تحاسب عليه. خلّي في عربيتك بس اللي تقدر تحاسب عليه.

خلّي في كتابك

ونفس الحكاية برضه، قال لك برضه بالنسبة للقاء ربنا سبحانه وتعالى: خلّي في كتابك بس اللي تقدر تحاسب عليه.

يعني المظالم والذنوب والمعاصي، اللي بينا وبين ربنا، واللي بينا وبين الناس. اللي بينك وبين ربنا سهل: قول يا رب، وارفع إيدك، وربنا كريم. لكن المظالم اللي بينا وبين الناس، همشي بيها إزاي؟ هعدّي بيها إزاي بعد كده؟

فلذلك مهمّ دلوقتي يا جماعة كل واحد فينا يراجع نفسه. يراجع المظالم اللي بينه وبين الناس، ويحاول يرجّع المظالم دي. ويشوف اللي بينه وبين ربنا، ويستغفر ويتوب إلى الله. عشان الواحد فينا بعد كده، لما ييجي يعدّي، يعدّي باللي يقدر يحاسب عليه.

وشكرًا، وجزاكم الله خيرًا.